Inissialiornermut tapersiissuteqartarneq pillugu Inatsisartut peqqussutaata allanngortinneranik Inatsisartut peqqussutissaattut siunnersuut
pillugu
Attaveqarnermut Pilersuinermullu aamma Ineqarnermut Ataatsimiititaliap
ISUMALIUTISSIISSUTAA
siunnersuutip appassaaneerneqarnissaanut saqqummiunneqartoq
Attaveqarnermut Pilersuinermullu aamma Ineqarnermut Ataatsimiititaliaq suliarinninnermini ukuninnga inuttaqarpoq:
Inatsisartuni ilaasortaq Lars Sørensen, IA, siulittaasoq
Inatsisartuni ilaasortaq Per Rosing-Petersen, Siumut
Inatsisartuni ilaasortaq Peter Grønvold Samuelsen, sinniisussaq, Siumut
Inatsisartuni ilaasortaq Godmand Rasmussen, Atassut
Inatsisartuni ilaasortaq Mogens Kleist, Kattusseqatigiit
Inatsisartut Attaveqarnermut Pilersuinermullu aamma Ineqarnermut Ataatsimiititaliaata UKA-2001-imi siunnersuut nassuiaatitai ilanngullugit misissuataarpaa.
Oqaluuserisassat Inatsisartut ullormut oqaluuserisassaannut ilanngunneqaqullugit qinnutigineqartut Inatsisartut ataatsimiinnerata pineqartup aallartinnissaa kingusinnerpaamik qaammammik ataatsimik sioqqullugu, tak. Suleriaatsimi § 39, saqqummiunneqarsimassapput tunniunneqarsimassallutiluunniit.
Ataatsimiititaliap uparuassavaa siunnersuut aatsaat ulloq 6. oktober 2001-imi tiguneqarlunilu agguaanneqarmat, piffissaq tunniussivissaq qaammat ataaseq qaangerlugu qaangiutereersoq. Tamanna ataatsimiititaliap eqqarsarnartoqarluinnartutut isigaa, tunniussinissamummi piffissaliussaq ilanngunneqarsimammat inatsisiliornermik sulinerup pitsaassusissaa qulakkeerumallugu.
Isumasioqatigiilluni ataatsimiinneq
Ataatsimiititaliap isumasioqatigalugu ataatsimeeqatigaa Ineqarnermut, Attaveqarnermut Pilersuinermullu Naalakkersuisoq Jørgen Wæver Johansen.
Siunnersuutip imarisai
Siunnersuut, kapitali 4 malillugu boligstøttemit illulittut taarsigassarsiallit 1. maj 2002-imiit ineqarnermut tapiissutinik pissarsisinnaajunnaassapput, tamannalu siunnersuut saqqummiunneqartoq atorlugu taartissaqartinneqassalluni.
Siunnersuutip immikkoortuani siullermi pineqarput kapitali 4 malillugu boligstøttemit illulittut taarsigassarsiallit 1. maj 2000-imit 30. april 2002-mut kr. 128.000 ataallugit inoqutigiittut isertitaqartut ineqarnermut apiissutinik pissarsisartut. Taakku akiligassanik akiligassanngortunik akiitsunillu, 1. november 2002 nallertinnagu qinnuteqaateqartoqarpat, isumakkeeriffigineqarnissamut piginnaatitaalissapput.
Siunnersuutip immikkoortuata aappaa siumut isigisuuvoq, pineqarlutillu kapitali 4 malillugu boligstøttemit illulittut taarsigassarsiallit ukiut marluk ingerlanerini kr. 128.000 ataallugit isertitaqarsimasutut siunissami uppernarsaasinnaasut. Taakku akiligassanik akiligassanngortunik akiitsunillu isumakkeeriffigineqarumallutik Naalakkersuisunut qinnuteqaateqarsinnaassapput. Qinnuteqaateqartup nalilinnik pigisaqarnerata inuussutissarsiorsinnaasutullu isigineqarnissaanut naatsorsuutigineqarnersoq kiisalu illup tunineqarnermini nalingata aalajangersimasumik naliliiviginerisigut aalajangiisoqartassaaq.
Ataatsimiititaliap maluginiarpaa § 21a ima oqaasertalerneqartussatut siunnersuutigineqartoq: "Taarsigassarsiallit piffissami 1. maj 2000-imit 31. april 2002-p..", aprilili 30-iinnarnik ulloqarmat ataatsimiititaliap Naalakkersuisut kaammatussavai "31. april 2002" "30. april 2002"-ngorlugu allanngortissagaat.
Amerlanerussuteqartut, Siumut IA-lu oqaaseqarput kapitali 4 malillugu boligstøttemit illulittut taarsigassarsiallit ineqarnermut tapiissutinik pissarsisinnaajunnaartussat siunnersuutikkut tamakkiisumik taartisiassaqartinneqassasut, maannali piumasaqaatit naammassigunikkit illuminniiginnarsinnaalissasut, sipaakkanik katersisinnaalissasut illortillu aserfallatsaalillugu. Taamaammat amerlanerussuteqartut inassuteqaatigaat siunnersuut akuersissutigineqassasoq.
Ikinnerussuteqartut, Atassut Kattusseqatigiillu oqaaseqarput siunnersuut eqqarsaatigilluagaanngitsoq, siunissarlu ungasinnerusoq eqqarsaatigalugu atorsinnaasumik aaqqiinerunngitsoq, kapitalimi 4-mik illullit inoqutigiit isertitaat apparpata sakkortuumik eqqorneqassammata. Ikinnerussuteqartut isumaqarput taarsigassarsialinnut kommuninullu aningaasatigut kinguneqaatissat naammattumik qulaajaavigineqarsimanngitsut, taamaammat ikinnerussutleqartut inassuteqaatigaat siunnersuut itigartinneqassasoq.
Taama oqaaseqarluni Inatsisartut Attaveqarnermut Pilersuinermullu aamma Ineqarnermut Ataatsimiititaliaata Inissialiornermut tapersiissuteqartarneq pillugu Inatsisartut peqqussutaata allanngortinneranik Inatsisartut peqqussutissaattut siunnersuut aappassaanigassanngortippaa.
Lars Sørensen, formand
Per Rosing-Petersen
Godmand Rasmussen
Peter Grønvold Samuelsen
Mogens Kleist